Il Comune di Moncalieri paga a Filippo di Savoia la somma convenuta di lire 500 viennesi, (...)

Serie Generale 371

(ST) Anno Domini millesimo CCC, indictione XIII^a, in Vigono silicet in castro dicti loci Vigoni, presentibus testibus infrascriptis videlicet domino Guillelmo de Montebello milite, domino Ottone de Megloreto de Pinayrolio, domino Caberto de Lucerna, domino Iohanne de Camilla et Amedeo de Bresatoribus de Pinayrolio, domino Nicolino Duco, domino Garono[1] de Romanis et Guillelmo Longo, ad hoc vocatis et rogatis. Cum universitas et comune Montis Calerii seu singulares persone ipsius loci inculparentur per illustrem virum dominum Phillippum de Sabaudie seu per curiam ipsius eo quod dicebantur comisisse et excelsum[2] fecisse in comuni vel in singularibus personis contra Ramacium de Buscha et homines suos et prepositum Luagnaschi, quibus interfecerunt boves et frangerunt plastra, qui venerant in Montem Calerium causa deportandi granum predicti domini Phillippi, venditum eisdem per dominum Guillelmum Guersium militem tunc temporis castellanum Montis Calerii seu per clavarium ipsius domini comitis, facientes iamdicti homines universitatis predicte estremitam et coadunationem cum armis, tam contra predictum Ramacium et homines suos quam contra prepositum predictum et contra homines de Saviliano qui dicebantur eciam emisse de dicto grano proibentes ne dictum granum extraeretur de terra Montis Calerii. Que omnia videbantur et dicebantur a iamdicto domino Phillippo et curia ipsius esse facta in preiudicium ipsius domini Philippi et contra honorem ipsius sive fuisset per universitatem predictam vel per singulares personas ipsius. Item super eo quod iamdicti homines predicte universitatis inculpabantur rixam habuisse in Pinayrolio cum hominibus universitatis Taurini, in qua rixa quamplures homines de Taurino et Monte Calerio vulnerati et interfecti fuerunt et que rixa facta fuit in regressu exercitus iamdicti domini Phillippi, quo factum fuerat versus terram dalphini, de omnibus excessibus factis et comissis per homines universitatis predicte Montis Calerii, tempore castellanie iamdicti domini Guillelmi occasione grani predicti domini Phillippi contra quamcumque personam et personas. Et de omnibus excessibus factis et comissis contra homines Taurini in rixa predicta, prefatus dominus Phillippus transsigit et concordavit cum comune et universitate predicta Montis Calerii et confessus fuit ad bonam concordiam et transsactionem cum ipsis hominibus et huniversitate[3] predicta Montis Calerii pervenisse qui dominus Phillippus ex certa sciencia et libera voluntate ad requisicionem ambaxatorum Montis Calerii de omnibus predictis excessibus et comisis, fecit sicut melius potuit michi Guidoni Marcoaldo notario infrascripto, ne ut persone publice recipienti nomine comunis et huniversitatis predicte et omnium singularium personarum dicti loci quorum interest vel interesse posset pacem et finem et omnimodam absolucionem et pactum ulterius non petendo de omni eo quod occasionibus supradictis, ab eis vel ab aliquo ipsoum, petere possent vel requirere aliqua occasione modo aliquo vel ingenio. Quam pacem et finem et absolucionem prefatus dominus Phillipus promixit mihi predicto notario, recipienti et stipulanti nomine quo supra, ratam et firmam hebere perpetuo et non contravenire de iure vel de facto; pro quaquidem concordia, transsacione ac pace et fine predictus dominus Phillipus confessus fuit habuisse et recepisse a predictis hominibus Montis Calerii seu comune libras quingentas bonorum viannensium nunc curencium per Montem Calerium, renunciando exceptioni non recepte et non numerate pecunie supradicte et espey future numeracionis; renunciantes eciam exceptioni non facte transactionis ac pacis et finis et non facte stipulacionis et omni iuri et exceptioni quo vel qua contra predicta vel aliquid predictorum venire posset. De quibus omnibus supradictis preceptum fuit michi infrascripto notario fieri publicum instrumentum unum vel plures si opus fuerit, ad ditaminem et conscilium domini Nicholini Duchi iurisperiti.

Et ego Guido Marcoaldus de Monte Calerio, publicus imperiali auctoritate notarius, interfui et rogatus hanc cartam scripssi.