Giacomo sire di Quart, vicario generale di Piemonte per Amedeo V, e Guglielmo di (...)

Serie Generale 330

(ST) Anno Domini millesimo decentessimo octuagessimo octavo, indicione prima, die sabati septimo mensis augusti, presentibus Vieto de Ripauta, Facio Baidono, Pellizia de Brenecio de Vigone et Guillelmo Buzann(...) de Taurino, testibus convocatis. Nobilis vir dominus Iacobus dominus Quarti, vicarius generalis Pedemontis pro illustri viro domino Amedeo comite Sabaudie et dominus Guillelmus de Ropecula milex castellanus Aviliane et baylivus Vallis Secuxie, ellecti concorditer et communiter arbitri et arbitratores et amicabiles compositores a domino Petro Provana de Cargnano iurisperito, vice et nomine universitatis Cargnani cuius sindicum se dicebat et certum nuncium ex una parte et sindicatorio nomine eiusdem universitatis, et a Iacobo de Rocholo notario Montis Calerii, vice et nomine universitatis et hominum Montis Calerii cuius et quorum sindicum et certum nuncium se dicebat, sindicario ipsius universitatis ex altera, super litibus et de litibus et contraversiis, querelis, questionibus et rancuris que vertebantur et erant inter dictas universitates et homines dictorum locorum, scilicet Cargnani et Montis Calerii prout in compromisso ab eisdem sindicis, nominibus quibus supra, in dictos dominos Iacobum et Guillelmum facto evidencius continetur, habita deliberatione solepni et auditis et intellectis omnibus que super questionibus predictis et qualibet predictarum dicere et hostendere voluerunt, utriusque partis diligenter investigata et cognita voluntate pro bono pacis et concordie, ex vigore compromissi predicti in eos facti, Dei nomine invocato, laudaverunt, arbitrati fuerunt dixerunt et pronunciaverunt atque mandaverunt: primo quod in perpetuum pax firma et duratura sit et servetur inter partes predictas et universitates predictas, tam inter ipsas universitates quam omnes et singulares personas de ipsis universitatibus, de omnibus dampnis, iniuriis et offensionibus hinc inde factis et datis tam in personis quam in rebus, morte, percussionibus et aliis quibuscumque modis. Et quod dictus sindicus dictarum universitatum sive parcium de predictis hominibus sibi faciant vicissim nominibus universitatum et hominum predictorum pacem et finem, remissionem et omnimodam absolutionem ac pactum de ulterius non petendo. Item quod si qua persona de dictis partibus fre(n)gerit dictam pacem seuque contra dictam pacem venerit pravus et proditor reputetur et ultra penas per dictos sindicos in compromisso appositas vel arbitratores puniatur ad domini voluntatem. Item quod Baemondus Della de Cargnano in perpetuum sit bapnitus de Cargnano et de tota terra comitatus Sabaudie et quecumque persona ipsum Baemondum in personam offenderit sit inpunis. Item quod quecumque persona de Cargnano daret ipso Baymondo aliquod conscilium vel iuvamentum solvat pro qualibet vice domino Tomaso de Sabaudia vel eius mandato libras L viannensium pro bampno et penis. Item quod territorium illud sive locus qui dicitur in Bruxatis sit et remaneat pascuum sicut retroatis temporibus esse consuevit et dicte universitates et persone de dictis universitatibus possint ibi pascuare seu animalia sua pascere, ire et reddire et conversari cum bestiis et sine bestiis et alia facere que olim consueverunt, exceptis terris et pratis factis et ad culturam reddeatis ab VIII^to annis circa proxime preteritis retroque remaneant possessionibus earundem, respondendo et reddendo de ipsis domino seu dominis a quibus tenentur sic solvi et respondere consuevit et solvendo taleas universitati de qua est quilibet de possessionibus supradictis terre vero et prata que ab VIII^to annis citra reddare seu reddata sunt noviter ad culturam, ad pascua redigantur et dimitantur sicut aliud vel alia pascua de Bruxatis. Et hoc dixerunt et pronunciaverunt arbitri predicti, salvo (iure) monasterii Sancti Michaelli Cluxini. Item dicti arbitratores ex forma arbitrarie potestatis eis concesse retinent in se potestatem pronunciandi et arbitrandi super questionibus inter dictas partes vertentibus, occaxione custodie seu camparie in iuris que asserunt se habere homines Montis Calerii in loco illo sito in territorio Sablonis, qui locus dicitur Gosola, prope castrum Sablonis et in loco illo ibi prope sito qui dicitur Quadratum. Item eodem modo retinent sibi potestatem pronunciandi et arbitrandi super custodia campis, territoris seu loci predicti de Bruxatis. Item retinent sibi potestatem pronunciandi et arbitrandi super omnibus et singulis in compromisso comprehensis de quibus et super quibus supra pronunciatum non esset. Item retinent sibi potestatem de eo quod in dictis Bruxatis habet Andreas Provana dicendi et pronunciandi. Item retinent sibi potestatem declarandi et interpretandi ac etiam corrigendi et supplendi prout expedire eisdem videretur super omnibus et singulis supradictis et omnem aliam potestatem ipsis in compromisso concessam quam quolibet modo quod in se retinere possent, precipientes sindicis supradictis, nominibus quibus supra, quod predicta facient et observent ipse universitates et persone predicte, sub pena in compromisso predicto impposita. Et predictam pacem[1] et remissionem, ut supra legitur, hodie faciant sibi ad invicem nominibus antedictis sub predicta pena. Et hec omnia et singula supradicta laudaverunt, arbitrati fuerunt, dixerunt, pronunciaverunt atque mandaverunt fieri observari et adimpleri supra presentibus et amologantibus incontinenti laudatum et arbitratum et confirmantibus supradictum. Et ego Oddonetus Machagnanus de Vigono, imperiali auctoritate notarius, hanc cartam, quam Iacobus Machagnanus condam notarius habreviaverat et preventu mortis complere nequivit, ex actoritate mihi concessa a domino Iacobo de Scalengiis, castellano Vigoni, prout in dictis suis habreviamentis inveni, nichil addito vel mutato quod substancia mutet preter punctum vel sillabam que substanciam non mutant, scripsi et in publicam formam reddegi et meo proprio signo consueto signavi.