Da Moncalieri, gli elettori del podestà partecipano a Giacomo di Selberico, cittadino (...)

Serie Generale 244 - Trascrizione a cura di Luca Patria

 

(ST) Anno Domini millesimo .CCLVI., indicione .XIIII., in Montecalerio, die martis .XI. intrante ianuario.

Nobili et sapienti viro domino Iacobo de Selberico honorabili civi Astensi.

Rufinus de Montafia, Peracius de Romano, Garoninus de Romano, Iordanus Piperarius, Petrus Magnanus, Guillelmus Avaronus, Iohannes de Valfredo, Ubertus Falavisca electores potestarie venture in Montecalerio per annum proxime venturum, constituti voluntate credencie dicti loci more solito cohadunate ad sonum campane, salutem et totius prosperitatis augmentum.

Confidentes de magnitudine, prudentia atque legalitate vestra vos in potestatem comunis et loci Montiscalerii unaniminiter elegimus et in rectorem per annum proxime venturum et si maiorem honorem vobis facere valeremus alacriter faceremus, dantes et promittentes vobis pro salario nomine comunis dicti loci et voluntate dicte credencie per annum unum libras .CCC. papiensium monete tantum et pro isto salario teneamini ibi tenere continue unum bonum iudicem et sapientem vobiscum et tres equos, videlicet unum destrarium et duos runcinos per totum tempus vestri regiminis et expensis vestris et non comunis predicti et domum locare et alia que vobis fuerint necessaria nec vobis debet fieri emenda alicuius equi nisi mortuus vel percussus vel mangagnatus fuerit gladio in cavalcata vel exercitu facta per dictum comune. In quo casu non potestis habere emendam de destrario nisi tantum librarum quinquaginta papiensium ad plus et de runcino sive palafredo librarum .XII. eiusdem monete. Nec potestis tenere ad periculum comunis Montiscalerii nisi unum destrarium et duos runcinos sive palafredos, iurando supra capitula Montiscalerii ipsa adtendere et observare. Cuius rei causa magnitudinem et sapienciam vestram de qua plenam gerimus fiduciam actentius deprecamus quatenus honore vestro et amore dicti comunis dictum regimen non respiceres ad salarii paucitatem reccipere dignemini et velitis.

Erga in comune Montiscalerii taliter more solito vos regentes quod possitis çito commendari et nomen vestrum in nostris partibus exaltetur adventuri regiminis et incepcio dicti anni sit quam cicius poteritis sincera.

Testes ibi fuerunt rogati: frater Iohannes Banasta et frater Bosso rector domus manssionis de Templo.

Et ego Palmerius sacri palacii notarius rogatus interfui et hanc cartam scripsi.