In Moncalieri, nel convento dei frati Minori, gli otto elettori del podestà a ciò (...)

Serie Generale 226 - Trascrizione a cura di Luca Patria

 

Nobili et sapienti militi domino Cunrado Pulsavino, scientia militari quamplurimum decorato, Vitelminus Granerius, Pixis de Trofarello, Gorius de Romano, Bergundius Sacus, Alberionus Marchoaldus, Iacobus Vasconus, Villelmus de Valle et Franchinus de Castro electi voluntate credentie Montiscalerii ad sonum canpane collecte ad eligendum potestatem ipsius loci pro anno proximo venturo, salutem et statum magnitudinis obtinere.

Nobilitati et providentie vestre harum serie sub conpendio duximus intimandum quod in Christi nomine pro anno proximo venturo unanimiter elegimus in potestatem, dominum et rectorem, videlicet a festo sancti Laurentii proximo venienti in antea usque ad annum proximum venturum ad quem locum pro ipsa potestaria et regimine estis venturus ad dictum festum sancti Laurentii et vobiscum ducere et habere unum bonum iudicem vestris expensis ad voluntatem conscilii dicti loci iuxta formam facti capituli super hoc. Item debetis ibi tenere duos equos ad minus. Item debetis iurare super capitulis dicti loci et stare sine eo quod ponatis vel recipiatis de ipsis capitulis arbitrium generale et sine eo quod ponatis ad conscilium aliquod quod sit vestre utilitatis vel alicuius de vestra familia. Eo salvo quod pro vestris negotiis vel vestri iudicis petere potestis licentiam credentie recedendi et sine licentia credentie non potestis extra locum pernoctare modo aliquo et hec omnia in pena capituli ordinata, pro hiis vero et vestro salario et vestri iudicis debetis habere libras centum et .XXX. secusiensium sive viannensium et medietatem datarum tantum et non plus et pro vestris ambaxatis quas feceritis pro comuni et voluntate conscilii iuxta formam capitulorum tantum solidos .VI. per diem et noctem et die quo veneritis tantum quantum unus ambaxator Montiscalerii. Item debetis respondere istis instrumento et literis infra secundum diem post quam vobis fuerint presentate et debetis responsionem facere in presentia testium et notarii ita quod de responsione appareat publicum instrumentum in quo contineatur de vestra voluntate expressim, videlicet si predictam potestariam recipitis pro dicto modo nec ne, alias si feceritis sit cassa et yrrita electio facta de vobis, ita quod versus comune predicti loci vel aliquem de ipso loco occasione dicte electionis actionem sive ius non habeatis. Item non potestis nec debetis habere emendam[1] equorum nisi mortuus vel percussus vel mangagnatus fuerit gladio in cavalcata vel exercitu facto pro comune Montiscalerii et de destrario libras .XXV. secusiensium tantum ad plus et de runcino sive palafredo libras .VI. tantum ad plus et non potestis tenere ad periculum comunis nisi tantum unum destrarium et duos runcinos sive palafredos et si minus fuerit dampnum quantitate predicta tantum debetis habere minus.

Auctum in Montecalerio ad domum fratrum minorum, in credentia ibi collecta ad sonum campane .MCCLIII., inditione .XI., die lune .XIIII. mensis iulii.

Interfuerunt testes: frater Villelmus umeliatus et Iacobus de Cario mandaerius comunis.

Ego Nicholaus Punçillonus notarius sacri palacii interfuis et hanc cartulam michi iussams cripsi.