Mutuo di lire 21 e soldi 8 dato da Alberto Cavalli, cittadino torinese, a favore di alcuni (...)

Serie Generale 202 -Trascrizione a cura di LUCA PATRIA

 

(ST) Anno dominice nativitatis millesimo .CC. quinquagesimo primo, die dominico .X. mensis septembris, indicione .VIIII..

Coram testibus infra scriptis ad hec vocatis specialiter et rogatis, confessi, taciti et contenti fuerunt Iohannes Camilia, Andreas Vilanus, Iohannes Petitus et Facius Petitus omnes cives Taurini sese ab Uberto de Cavalla cive taurinense habuisse et recepisse libras .XXI. et solidos .VIII. minus denarium .I. secusiensium pro emenda, videlicet restitutione suorum bonorum quos homines Montiscalerii ceperunt sub treguis iusta sive prope batenderium Caburreti ut dicebant, renunciantes exceptioni non habite et non recepte pecunie, scilicet dictus Iohanes Camilia libras .VIIII. et solidos .II. pro emenda et restitucione trium bouum et Andreas suprascriptus solidos .L. pro emenda unius bovis et Iohannes Petitus solidos .LXX. pro emenda et restitucione unius bovis atque Facius superius memoratus libras .VI. et solidos .VI. minus denarium .I. pro restitucione et emenda duorum bouum et sic sunt in summa libre .XXI. et solidi .VIII. minus denarium .I. secuxiensium, unde prefati Iohannes, Andreas, Iohanninus et Facius cesserunt, dederunt sicut melius potuerint dicto Uberto de Cavalla omnia iura et actiones omnes reales et personales et directas quam et quas habebant vel exigere poterant contra homines de Montecalerio seu comune illius loci occasione superius denotata ponentes eum in locum suum et constituentes ipsum eorum procuratorem tam quam in suam rem et locum suum.

Hoc actum est in Taurino, in curte ipsius Iohannis Camilie.

Interfuerunt testes: Raimondus Loira, Petrus Ferrerius et Oddonus filius Rodulfi Vairolii.

Et ego Iohannes Mantellus notarius hiis omnibus interfui et rogatus hanc cartam ut supra traddidi et scripsi.