Mutuo di lire segusine nuove 96 dato dal notaio Palmerio, a nome di Oberto Provana, di (...)

Serie Generale 164

 

(ST) Anno Domini millesimo .CCXLIIII., inditione secunda, in Montecalerio, die mercurii tercio decimo intrante iulio. Confessus fuit dominus Opiçio de Lomello, iudex domini Valterii de Curte potestatis Montiscalerii, nomine ipsius comunis Montiscalerii et conscilio et voluntate credencie loci eiusdem cohadunate more solito ad sonitum campane et ipsi credendarii quorum nomina inferius leguntur, se mutuo accepisse a me Palmerio notario nunc comunis Montiscalerii predicti vice et nomine Oberti Provane de Cargnano libras nonaginta et sex bonorum secusinorum novorum seu vianensium, renunciantes exceptioni non accepte et non numerate pecunie. Quos denarios per stipulationem michi iamdicto Palmerio recipienti nomine dicti Oberti Provane solvere promisserint aut ipsi Oberto vel suo certo misso in Cargnano vel in Montecalerio secundum quod prenominato Oberto placuerit usque ad annum unum proxime venientem. Et si item non solverint promisserunt michi dicto nomine recipienti vel ipsi Oberto dare et solvere pro lucro denarios quatuor pro qualibet libra singulis mensibus donec eos tenuerint. Et postea immo ultra dictum terminum dictos denarios solvere distullerint ipsi creditori mutuum, dampnum atque expensas que vel quas dictus creditor fecerit vel habuerit pro iamdictis denariis exigendis vel recuperandis eundo, redeundo, placitando, mutuando seu quolibet alio modo suum expendendo vel dampnificando dictus iudex nomine iamdicti comunis et eiusdem credencie conscilio et ipsi credenciarii seu consciliarii michi suprascripto Palmerio nomine iamdicto aut ipsi Oberto solvere ac restituere in imperpetuum promisserunt. Credendo ei de expensis, dampno et mutuo in suo simplici verbo sine omni proba et sacramento. Dantes insuper dictus iudex nomine supradicto michi Palmerio memorato recipienti nomine ipsius Oberti et ipsi Oberto licenciam et absoltum capiendi pignus ad suam voluntatem et sua auctoritate post terminum usque ad completam solucionem tam lucri quam sortis et expensarum.

Et inde dominus Castagnus iudex, Iacobus de Montefalcono, Ruffinus de Montafia, Nicholaus Bergognonus, Iohanes Marchoaldus, iohannes Vasconus, Melanus duchus, Carçonus Granerius, Bosso de Castro, Gavarus notarius, quilibet illorum in solidum fideiussores et principales debitores se constituerunt et pro his omnibus adtendendis et observandis dictus iudex nomine superius dicto et conscilio supradicte credencie et ipsi credenciarii et fideiussores predicti et in solidum quilibet omnia bona dicti comunis et sua, preter ipsum iudicem qui non se obligavit nisi nomine dicti comunis, ei pignori obligavit et specialiter reditus et proventus molandinorum ipsius comunis usque ad plenam ut supra legitur solucionem tam sortis quam lucri dampnorum et expensarum, dicentes dicti iudex et credendarii atque fideiussores et adfirmantes hoc mutum fecisse ad utilitatem ipsius comunis et in eorum utilitatem dictam pecuniam versam esse, videlicet ad solvendos soldatarios ipsius comunis qui pro ipso comuni iverant in exercitu astensi apud Braidam, renunciantes ab ipsis omnibus tam ab ipso iudice et credenciariis quam a fideiussoribus suo et ipsius comunis nomine ut supra in hoc facto omni placito et omni legum auxilio et ambabus novis constitutionibus una quarum dicitur quod nequis ex reis conveniatur in solidum donec alter presens sit et solvendo, alia que dicitur quod principalis debitor prius conveniatur quam fideiussor et eppistule divi Adriani, ita quod quilibet iamdictorum debitores in solidum preter ipsum iudicem ut supra et fideiussores similiter in solidum conveniri possit cum effectu. Qua omnia et singula ut supra leguntur adtendere et observare et non contra venire aliquo tempore vel aliqua occasione Vercellinus nuncius ipsius comunis de voluntate et precepto dicti iudicis et credenciariorum et fideiussorum super animam ipsorum credenciariorum et fideiussorum et quod ipsi adtendent et observabunt iuravit.

Nomina quorum consciliatorum qui ad hoc mutuum facere fuerunt sunt hec: dominus Ruffinus de Montafia, dominus Castagnus, Iacobus de Montefalcono, Ubertus Sacus, Papalardus, Iordanus Platus, Mainfredus Trunna, Ubertus Marchoaldus, Gavarus notarius, Garoninus, Franchinus de Castro, Melanus Duchus, Otto Bonafantus, Carçonus Granerius, Nicholetus iudex, Barachinus, Albricus Trunna, Albricus Marchoaldus, notarius Remigeus, Ubertus Foranus, Dospertus, Guillelmus de Piro, Iacobus Pixanus, Donatus Pogolotus, Iacobus Piperarius, Iohannes Vasconus, Bosso de Castro, Valfredus Calvus, Peraçius de Romano, Maçola, Vitelmus Granerius, Gorius de Romano, Bergundius Sacus, Palmerius notarius.

Testes ibi fuerunt rogati: Ubertus Romagnanus et Çonus de Calpice clavarii nunc dicti comunis et Bertulinus Eurardus et plures alii.

Et ego Palmerius sacri palacii notarius rogatus interfui et hanc cartam de mandato et iussu omnium predictorum iudicis scilicet et consciliatorum atque fideiussorum scripsi.